ភ្នំពេញ៖ រាជរដ្ឋាភិបាលកម្ពុជាបញ្ជាឱ្យបញ្ឈប់ការកែប្រែរូបរាងខាងក្រៅ ឬវាយកំទេច ឬបំផ្លាញសំណង់វប្បធម៌ ប្រវត្តិសាស្រ្ត សំណង់បុរាណ និងសំណង់អគារបេតិកភណ្ឌ ដោយថាដើម្បីការពារសំណង់ទាំងអស់នេះឲ្យបានគង់វង្ស។
ក្នុងសារាចរចុះថ្ងៃទី១២ ខែតុលា ឆ្នាំ២០២១ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថា ទំនើបកម្មទីក្រុងបានបណ្ដាលឲ្យមានការវាយបំផ្លាញធ្វើឱ្យខូចខាតទៅលើសំណង់បេតិកភណ្ឌដែលស្ថិតនៅក្នុងតំបន់បេតិកភណ្ឌទីក្រុងតាមបណ្ដារាជធានី-ខេត្ដដែលជាបេតិកភណ្ឌជាតិដ៏មានតម្លៃ។
ក្នុងន័យនេះសម្ដេចបានណែនាំឲ្យបញ្ឈប់ការកែប្រែការផ្លាស់ប្ដូររូបរាងខាងក្រៅ ឬធ្វើឲ្យខូចសោភ័ណភាពសំណង់ក្នុងតំបន់បេតិកភណ្ឌទីក្រុង និងបញ្ជាឲ្យទប់ស្កាត់ការវាយកំទេច ឬបំផ្លិចបំផ្លាញសំណង់វប្បធម៌ប្រវត្តិសាស្រ្ត សំណង់បុរាណ និងសំណង់អាគារបេតិកភណ្ឌ ដើម្បីការពារឲ្យបានគង់វង្ស។
សម្ដេចតេជោបានលើកឡើងថា៖ «ការថ្លឹងថ្លែងរវាងការអភិរក្សនិងការអភិវឌ្ឍគឺត្រូវតែមានតុល្យភាព» ។
បើតាមសារាចរណែនាំរបស់សម្ដេចតេជោ ការជួសជុល ការកែប្រែ ការវាយកម្ទេច ទៅលើសំណង់អគារបេតិកភណ្ឌ គឺត្រូវសុំការពិនិត្យនិងអនុញ្ញាតពីក្រសួងវប្បធម៌និងវិចិត្រសិល្បៈ និងអាជ្ញាធរពាក់ព័ន្ធជាមុនសិនទើបអាចធ្វើការកែប្រែលើសំណង់នោះបាន៕
